Come el nass on umarell

El Piero el laorava a la Ceretti
e adess lè andaa in pension de tri o quatr’ann,
de conseguenza el leva su ai vòtt or
però l’è minga bun de fa nagòt.

L’è semper lì, dedrè de la sua dona
a controlà se l’è che l’è adrè a fa
el ciciara el ciciara e lè l’è stufa
de aveghel semper lì tacà a la scossa

Un dì che n’e podeva proppi pù
la poera dòna la ghe met in man
el guinzali de Fido el can de cà
e la ghe dis – su, dai, andì un poo a spass!-

lu el ciapa su el sò can con aria offesa
el se tira adrè la porta cont’on bòt
poeu giò per strada cont’el can ch’el tira
el riva in piazza el sa nò come l’ha faa

Intratanta che el Fido el fa i sò ròbb
lù el varda in gir a vedè ‘se gh’è de fà
arent d’ona ramad gh’è on grupet
de omett anca lor tucc cont’el sò can

inscì el va là anca lù insema al sò Fido
ch’el taca subit a nasà i sò sòci
el se met lì a vardà dent de la ramada
e denter in del bus gh’hinn di operari

parola tira l’altra i omett insema
fan sù on bel rebelott de commentari
-varda quel lì, ma no, l’è minga bon,
ormai gh’è in gir nisun che el sa ‘s’el faa-

inscì el Piero, content de avè trovà
on quai vun de cascià ball in compagnia
el dis la soa – conossi on offellee
che ghe vegn mal financa el pan cont l’uga!-

rivaa mezz dì i umarei turnen a cà
intanta anca i so donn han ciapaa fià
el Piero el g’ha on quai coss de conta su
e la pasta l’è lì pronta in del piatt

-doman a semm d’acord de andaa in via Larga
che gh’è un cantier che hinn adree a trà giò ona cà-
el Fido el dòrma sòta ona cadrega
l’ha fa la pasegiada e l’ha mangiaa.

15 novembre 2020