L’Isola

I cà de on temp i cà de pòera gent
de operari e impiegaa de legnamee
indoe ch’el cèss l’era in fond a la ringhera
e gh’èra semper la fila per andà
quèi che hinn a stà financa la mia cà
quei che la portinara ne ciamàva
per nòmm de in mèzz la cort per dì che gh’era
on pacchett ona busta o de andà giò
che gh’èra el cervellee rabbios ‘me on can
perché el ballon de un fioeu el gh’ha s’ceppà i veder

Be’, quei cà lì gh’hinn pù perché i hann traa giò
oppur gh’hann miss el cess e rifaa el machiasg
e i hann fà diventà ona bombonera
per i sciori che ghe fà fin de stà in ringhera
o gh’han miss dent el fioeu o la soa morosa
e inscì al post del sciostree gh’è ona boutique
e de faccia a la botique gh’è on mercatino
de quèi che vènden on ier d’antiquariaa
e poeu de chì se ved i gratacieli
e fà nagòtt se de sol se ne ved pù

e i vègg, quei che de cà eren lì de semper
che eren sòlit andà giò a provvèd
‘se t’interèssa a tì che fin hann faa
pensa per ti e stà minga lì a casciàss
o ch’hinn mort oppur gh’hann dà ona cà
in fond a Forze Armate o a la Baggina
gh’è anca el supermercaa, cossa te voeret
va ben ciciàren pù sù la ringhera
ciciararàn ancamò d’on’altra part
l’è la vita, l’è el progresso, la città.

25 novembre 2020