Oh, pòera dòna

Oh, pòera dòna che te stee sul Domm
e l’è domà dal settcènt che te see lì
anca se i milanès d’incoeù hinn convìnt
che te see lì de quand che l’han fàa sù

t’è faa in temp a ved brumm e carr de mòrt
e prima anmò el pontegg per portàt sù,
perché, a cuntàla giùsta, “piscinina”,
te set on bel donon de quatter meter.

El Perego, el scultor ch’el t’ha fa su,
de ramm e doradura el n’ha drovà
per faa ona statoa inscì granda, e poeu la gent
la t’ha subit ciamada “Madonina”.

E va ben, morta lì, questa l’è storia.
Adèss te see lì soravia e te vàrdet giò
come t’hànn dì de faa quand t’hànn mìs sù,
domà che i milanès ormai gh’hinn pù

e i noeuv vègnen de tucc i part a faa Milan
e varden o i vedrin o i sò smarfòn,
leven su nanca i oeugg de andà no a sbatt
figuràss s’i e leven su per vardà tì!

Ormai te see ona ròba de turista,
te varden domà lor gh’è nient de faa,
on quai cines, on ingles, tedèsch e on svizzer,
mia poera dòna: ne toca rassegnàss!

20 novembre 2020