El sògn

Incoeu dopo mezz dì me sont traa giò
a faa on sognèt d’ona mezz’ora nanca
però ho faa in temp a faa on sògn el pussee bell
che fasevi da on ann o giò de lì

sèrum al mar indoe che andavum semper
indoe quest’ann gh’èmm minga pòdu andaa
gh’era la pandemia gh’era el lock down
inscì semm restaa a cà compagn del mond

be’ l’era nò quest’ann ma l’ann che vegn
e el mar la cà fittàda semper quei
e numm buttaa giò al sol compagn di gatt
la faccia al vent e on tochell de nient indòss

mi vorevi fà el bagn e ti t’è barbotta
on quaicòss de sentiss mal de sentì frecc
-regòrdess de la maschera- e giò a rid
-quèlla de andaa sot’acqua…- e giò a ghignà

adess son chi però me piasaria
de vess ancamò là stravacaa al sol
quasi quasi me giri e sari i oeugg
el poeu vess che me troevi ancamò al mar.

16 novembre 2020